Libros de texto - Información importante

Venres, 17 de abril de 2020

Bos días familias. Esta mesma mañá contactou con nós a inspección educativa para comunicarnos varios aspectos importantes con respecto ao desenvolvemento da terceira avaliación:

1. A volta ás aulas semella difícil e aínda non se pode saber cando poderemos facelo. 
2. O avance na materia non está prohibido, tampouco é obrigatorio. Nos deixan a decisión a nós. Tamén nos insisten en que aínda que decidamos continuar co curso, se o alumnado non segue as actividades non podemos penalizalas de ningún xeito.
3. A avaliación se realizará coa información recadada ata o inicio da corentena e como moito podemos valorar positivamente o traballo realizado dende os fogares, nunca negativamente. Ademais esta valoración positiva sería sempre polo interés mostrado, non pola calidade do traballo en si.
4. Libros de texto. Non existe unha directriz clara sobre que deberemos facer ao respecto. Dinnos que non se opoñerán ao que decidamos. Neste sentido parece que a protección civil de A Rúa se ofrece a axudarnos con isto e a levar aos domicilios os libros de texto que estean na aula -que no noso caso, son todos-. Posiblemente esta é unha decisión moi complicada como para tomala a nivel xeral de Galicia xa que non podemos facer que a xente acoda en masa a un mesmo lugar aínda que só sexa por uns minutos. EN NINGÚN CASO SE PODERÁ IR A RECOLLER PERSOALMENTE OS LIBROS AO CENTRO.

Dende as nosas titorías, queremos trasladaros esta información xunto coas nosas decisións particulares ao respecto dos seguintes apartados.

COMUNICACIÓN AO NOSO CORREO ELECTRÓNICO

A día de hoxe houbo familias que nos realizastes consultas, pero non todo o mundo contactou con nós. Por iso vos pedimos que nos contactedes o antes posible aos nosos correos electrónicos para establecer unha vía de contacto.

Silvia: silvia.fernandez.lopez@edu.xunta.es

Crespo: m.g.crespo@edu.xunta.gal

FORMULARIO DE CONSULTA

Cando teñamos un bo número de correos electrónicos, enviarémosvos un formulario de consulta na que pediremos a vosa opinión ao respecto dos seguintes temas:

• Decisión individual e particular de cada familia sobre se queredes recibir os libros na vosa casa e traballar sobre eles os contidos que aínda non tocamos. 
• No caso de ser afirmativa a vosa disposición a continuar co traballo nos fogares, precisaremos unha dirección na que poidades recibir os libros. Así mesmo, precisaremos o voso consentimento escrito para que facilitemos esa información persoal á protección civil de A Rúa. 
• Nos gustaría saber as posibilidades de acceso ou dificultades que atopastes ata o de agora para poder conectarvos á información que tivemos enviado. Por exemplo: non dispoñedes de internet, non tedes acceso a unha impresora, non tedes dispositivo co que poder acceder de forma diaria a internet... 
• No propio formulario vos daremos os nosos números persoais de teléfono para que poidamos ter un contacto máis directo e continuo. Así mesmo vos preguntaremos sobre a posibilidade de que fagamos un grupo de whatsapp no que comunicarnos calquera novidade.
• Aínda no caso de que non queirades formar un grupo de whatsapp sempre nos poderedes contactar de forma individual e privada por eses medios. 

 

CONTINUACIÓN DAS ACTIVIDADES E AVALIACIÓN DAS MESMAS

Aquelas familias que decidan continuar co traballo dos libros o farán en base á súa autonomía. Somos conscientes das dificultades de moitos de vós para acceder a internet ou a recursos dixitais e por ese motivo non nos opoñeremos a que cada quen continue ao ritmo que decida de forma individual. 

Ademais, para nós -Silvia e Crespo- resulta francamente difícil continuar co traballo nos libros a distancia porque non dispoñemos no noso fogar do libro de texto en cuestión e tanto unha coma o outro residemos fóra do Concello de A Rúa e non nos poden facer chegar os libros.

Por eses motivos, vos emprazamos a que nos consultedes dúbidas -de xurdir estas- e a que na medida do posible volas poidamos resolver. 

Así mesmo, no respecto á avaliación das actividades. Sempre e cando poidamos facelo non teremos inconvinte en que por medios telemáticos nos fagades chegar páxinas ou fotografías para a súa corrección. Non obstante, a dificultade das tarefas -salvo contadas excepcións-, non é moi elevada e calquera persoa adulta ou irmáns de cursos maiores poden axudar neste sentido. Aínda así, insistimos en que nos atopamos á vosa disposición, dentro dos límites razoables.

O BLOG

Antes de que todo isto comezase, a idea de facer un blog para subir información e traballo para as familias era algo que algunha vez se nos pasara pola cabeza, pero que a falta de tempo impedía constantemente. Así e todo en 30 días aprendimos como crealo, como melloralo, como empregar recursos dixitais que ata ese momento eran meramente anecdóticos e convertilos en verdadeiras ferramentas de aprendizaxe dixital. E todo isto sen axuda nin formación.

Agora nos daría moita mágoa deixar de empregalo. Por ese motivo imos a redobrar os esforzos e mentres intentamos manter un seguimento do traballo dende o fogar tamén continuaremos subindo contidos ao blog e seguiremos innovando para achegarvos máis e máis actividades e propostcas culturais.